Syeda Zainab(s.a) kay maqaam-o-azmat ko kon jaan sakta hay. un kay sabr ko biaan karney say alfaaz qaasir hain. Aap ka sabr wo sabr nahin, jis kay ikhtiar karnay pay insaan majboor hota hay. Aap ka sabr socha samjha aur usooli sabr hay.
Aik riwaaiat main hay kay jab roz-e-Ashoor, aap(s.a) maqtal main tashreef laieen, to Hazrat Imam Hussain (a.s) kay jism-athar kay paas tashreef lay gaieen. Aap (s.a) nay Imam-e-Aali maqaam kay sar-bureeda jism ko dono haathon say buland kiaa aur farmaaia,
“Khudawanda! Hamari iss qurbaani ko qubool farmaa lay.”
Aik aur riwaaieat main hay kay farmaati hain,
“Khudawanda! Apni azmat kay muqaabley main hamaari iss qaleel qurbaani ko qubool farmaa lay.”
Allama Ghaderi likhtay hain,
“wo raat ahl-e-bait (a.s) kay liay museebat-o-andoh ki khofnaak raat thee……lekin gham-o-alam ki shiddat aur khuof-o-vahshat kay aalim main Ali (a.s) ki baiti nay istaqaamat , paidari , sabr aur tahammul ki misaal qaim kar di…..Zainab (s.a) kay sabr-o-istaqaamat , azm-o-istaqlaal aur baargah-e-Ilahi main akhlaas-e-bandagi ki azmat kay liay yehi kaafi hay kay masaaib-o-aalaam ki us sakht tareen raat main bhi Ali(a.s) ki baiti nay namaz-e-tahajjad tark na ki.”
Al-gharz , ham un ki shaan kia biaan kar saktey hain, jinhen waqt-e-rukhsat Hazrat Imam Hussain(a.s) nay farmaia thaa,
“Meri piari behan! raat kay nawaafil main mujhey faramosh na karna.”
Allah pak unhi ki shhan-o-azmat kay sadqay, hamain kaneezan-e-zainab(s.a) main shaamil farmaaey(Ameen)
0 comments: